Gwybodaeth

Maes B yw brawd bach swyddogol yr Eisteddfod liw nos, lle ceir perfformiadau gan dros 30 o brif fandiau, artistiaid a DJs Cymru. Mae Maes B eleni’n argoeli i fod yn fwy ac yn well nag erioed o’r blaen. Cynhelir yr ŵyl yn ardal Is-y-coed ar gyrion Wrecsam, gan agor Nos Fawrth y 5ed o Awst a’r parti i barhau tan Nos Sadwrn y 9fed. Disgwyliwch barti heb ei ail.

A oes unrhyw gyfyngiadau o ran oedran?

Mae’n rhaid i chi fod yn 16 oed neu’n hŷn i fynd i Maes B a’r Maes PeByll. Byddwn yn gofyn am brawf o’ch oedran ar gyfer y tocynnau, felly cofiwch ddod ag ID gyda chi. Os na allwch chi ddangos ID pan ofynnir i chi, byddwn yn gofyn i chi adael y safle.

Mae modd i unrhyw un o unrhyw oedran fynd i’r Eisteddfod ei hun.

Ni chaniateir mynediad i unrhyw blentyn o dan 16 oed i arena Maes B neu’r maes Pebyll, hyd yn oed os yng nghwmni oedolyn.
Polisi Chwilio

Bydd deiliaid tocynnau yn cael eu chwilio wrth fynd i mewn, mae Maes B yn gweithredu polisi chwilio trylwyr ac yn gwirio pob bag.

Bydd unrhyw ddeiliad tocyn sy’n gwrthod cael eu chwilio, naill ai wrth fynd i mewn neu ar y safle, yn gorfod gadael Maes B.

Os ydym yn credu eich bod yn cuddio eitemau gwaharddedig, efallai y cewch eich archwilio drwy bwyso a chwilio pocedi.

Bydd bin amnest tu allan i’r babell chwilio i roi cyfle i ddeiliaid tocynnau waredu sylweddau anghyfreithlon cyn cael eu chwilio.

Gall unrhyw un a ddarganfyddir mewn meddiant o sylweddau anghyfreithlon ddisgwyl gadael y safle neu eu harestio.

Bydd unrhyw un a ddarganfyddir mewn meddiant o arf ymosodol yn cael ei arestio.

Os byddwch yn dod ag eitemau gwaharddedig cyfreithiol i Maes B, fe’u dychwelir i chi pan fyddwch yn gadael y safle. Os na fyddwch yn casglu eich eitem erbyn diwedd Maes B, ni fydd yr eitem yn cael ei ddychwellyd i chi. Nid yw hyn yn cynnwys alcohol, ni fydd unrhyw alcohol a atafaelir yn cael ei ddychwelyd.
HER 25

Byddwn yn gweithredu ac yn gorfodi polisi llym Her 25 ym Maes B. Os na allwch chi ddangos ID dilys pan ofynnir i chi, byddwn yn gofyn i chi adael y safle a dod yn ôl gyda’ch ID. Felly, os ydych chi’n ddigon lwcus i edrych yn 25 oed neu’n iau, cofiwch ddod â math o ID sy’n dderbyniol gyda chi. Ceir manylion pellach ar y mathau dilys o ID ar Validate UK. (https://validateuk.co.uk/ )

Mae mathau dilys o ID yn cynnwys:

– Trwydded yrru neu drwydded yrru dros dro gyfredol, gyda llun.

– Pasbort dilys (dim llungopi). NI dderbynnir unrhyw basbort sydd ddim yn gyfredol.

– Cerdyn Cynllun Safonau Prawf Oedran (sy’n dangos hologram PASS).
A yw pris gwersylla wedi’i gynnwys ym mhris fy nhocyn?
Faint mae’n ei gostio i barcio car?
Pryd fydd y maes pebyll yn agor?
Sut mae cyrraedd y maes peByll?

Dilynwch y cyfarwyddiadau a fydd ar gael ar-lein yn nes at y digwyddiad. Bydd yn rhaid i bawb sy’n gwersylla gofrestru ar ôl cyrraedd swyddfa’r safle, lle byddan nhw’n cael band arddwrn.

Mae’n bosib y byddwn yn gofyn i bobl sy’n gwersylla heb fand arddwrn dilys i adael.
Ga’ i ddod â cherbyd gwersylla neu garafán?
Pan fydda’ i’n cyrraedd, ga’ i osod fy mhabell unrhyw le?
A oes angen i mi gyrraedd cyn amser penodol er mwyn gosod fy mhabell?
Ble alla’ i barcio fy nghar?
Ga’ i ddod â fy alcohol fy hun?
Mae terfyn ar faint o alcohol y gallwch ei ddod ar y safle –

Ar eich mynediad cyntaf gallwch ddod â naill ai:

Hyd at 30 can o gwrw neu seidr (Neu 13 litr mewn poteli plastig).

Hyd at 20 can o goctel parod neu gymysgydd alcoholig.

Bocs gwin 3 litr.

1 Litr o Wirodydd.

Ac unwaith y dydd ar ôl hynny gallwch ddod â naill ai:

Hyd at 20 can o gwrw neu seidr (Neu 8 litr mewn poteli plastig).

Hyd at 10 can o goctel parod neu gymysgydd alcoholig.

Hyd at 1.5 litr o win mewn potel blastig neu bocs.

70cl o wirodydd.

Noder – Bydd unrhyw alcohol sy’n fwy na’r terfyn yn cael ei gymryd oddi arnoch, ac ni fydd yn cael ei ddychwelyd.
Cyffuriau a Chyffuriau Meddwol Cyfreithlon

Mae gan Maes B agwedd llym o ddim goddefgarwch ar draws safle’r ŵyl mewn perthynas â chyffuriau anghyfreithlon a chyffuriau meddwol cyfreithlon. Ni chaniateir i chi ddod â chyffuriau meddwol anghyfreithlon na chyfreithlon o unrhyw fath i’r digwyddiad, ac ni chaniateir eu gwerthu ar feysydd yr ŵyl, a phetai unrhyw un yn cael ei ddal yn gwneud hynny, byddai’n gallu cael ei droi allan yn unol â’n proses ffurfiol a byddai’r heddlu’n cael gwybod am y digwyddiad.
A ganiateir llusernau papur, ffaglau, tân gwyllt, generaduron neu danau gwersyll?
Ga’ i ddod â stôf neu farbeciw bach i goginio bwyd?
A fydd bwyd yn cael ei werthu ym Maes B?
A oes cawodydd ar y safle?
Os bydd swyddogion diogelwch yn cymryd rhywbeth oddi arna’i, beth ddylwn i ei wneud?

Os nad yw’n anghyfreithlon (mae hynny’n fater cwbl wahanol), gwnewch yn siŵr eich bod yn cael manylion adnabod ac enw’r swyddog diogelwch, ac efallai ewch gyda’r swyddog i’r man eiddo coll, lle gallwch gasglu eich eitem ar ddiwedd yr ŵyl neu dalu am gael ei anfon yn ôl atoch. Ni ddychwelir unrhyw alcohol sydd yn cael ei gymryd oddi arnoch.
Ymwelwyr anabl

Mae’n rhan o bolisi Maes B a’r Eisteddfod i fod yn ddigwyddiad cynhwysol lle mae croeso i bawb. Rydym yn gwneud pob ymdrech i ddarparu ar gyfer amrywiaeth eang o anghenion a sicrhau bod y digwyddiad mor hwylus â phosib. Dylid nodi mai digwyddiad mewn cae yn yr awyr agored yw Maes B a’r Eisteddfod, ac o’r herwydd, mae’n bosib y bydd defnyddwyr cadeiriau olwyn yn ei chael yn anodd symud o gwmpas mewn rhai rhannau o’r safle. Os oes angen rhagor o wybodaeth arnoch am drefniadau mynediad ar gyfer pobl anabl, rhowch wybod i ni.

Rydym yn gweithio mewn partneriaeth â Byw Bywyd er mwyn galluogi ymwelwyr â phroblemau symudedd i fwynhau dod i’r ŵyl. Mae stondin Byw Bywyd bob amser mor agos â phosib at y brif fynedfa i’r Maes, ac mae modd i chi logi cadeiriau olwyn a sgwteri yn ystod eich ymweliad yma. Rydym yn argymell bod ymwelwyr sy’n dymuno defnyddio’r gwasanaeth hwn yn trefnu ymlaen llaw. Mae modd gwneud hyn drwy ffonio 01286 830 101.

Bydd toiled i bobl anabl ar y safle, gyda ramp er mwyn cael mynediad hwylus.

Dylai fod ramp ar gael er mwyn cael mynediad i unrhyw adeiladau.

Bydd llwyfannau hygyrch dynodedig ar gael i’w defnyddio yn Maes B, ond os ydych chi’n cael unrhyw broblem, rhowch wybod i aelod o staff Maes B, a fydd yn fodlon eich helpu i ganfod lle diogel ac addas i chi wylio’r digwyddiadau.

Os oes angen cymorth cynorthwyydd personol arnoch, rydym yn cynnig tocynnau am ddim. Cyn rhoi tocynnau i Gynorthwywyr Personol, bydd yn rhaid i ni gael un o’r mathau canlynol o dystiolaeth:

– Tudalen Flaen Lwfans Byw i’r Anabl / Taliad Annibyniaeth Bersonol (dim cyfradd benodol)

– Tudalen Flaen llythyr Lwfans Gweini (dim cyfradd benodol)

– Tystiolaeth o fod wedi cofrestru â nam difrifol ar y golwg (dall)

– Cerdyn ID Cydnabyddedig ar gyfer Cŵn Cymorth

– Cerdyn Mynediad CredAbility

Byddwn yn cymryd pob cam rhesymol i sicrhau bod pawb yn mwynhau ymweld â’r Maes. Fodd bynnag, os byddwch chi’n cael unrhyw drafferthion, cysylltwch ag aelod o staff Maes B. Byddwn yn delio â’ch pryderon a bydd aelod o Dîm Rheoli’r Eisteddfod yn cysylltu â chi cyn gynted â phosib i drafod y mater.

Rhif ffôn Swyddfa’r Eisteddfod yw 0845 4090 900 a dyma’r cyfeiriad e-bost: gwyb@eisteddfod.org.uk.
TOCYNNAU - Termau ac Amodau

Mae tocyn cyfnod Maes B yn cynnwys gwersylla ym Maes B, mynediad i gigs Maes B gyda’r nos, yn ogystal â mynediad i Maes yr Eisteddfod yn y dydd.

Rhaid i chi fod yn 16oed+ i fynychu Maes B. Byddwn yn gofyn am brawf oedran ar gyfer tocynnau, felly sicrhewch for ID gyda chi. Os nad ydych yn medru dangos ID pan gofynnir, byddwn yn gofyn i chi adael y safle.

Os ydych yn mynychu Maes yr Eisteddfod, cofiwch ni cheir mynediad i unrhywun ar ôl 21.00 bob nos.

Polisi alcohol – Ni cheir mynediad gydag alcohol ar brif faes yr Eisteddfod.

Nodwch, os gwelwch yn dda, nad yw eich pryniant tocynnau yn drosglwyddadwy, ac ni roddir ad-daliad. Ni fyddwn yn gyfrifol am docynnau a gollwyd, na rhai a gafodd eu dwyn. Gall unrhyw berson sy’n ail-werthu tocynnau yn anghyfreithlon, (neu’n ceisio gwneud hynny) gael ei docyn wedi ei ddileu heb ad-daliad a heb iawndal. Gwerthir tocynnau yn unol â’r rheolau ac amodau yma. Ofnwn na ellir cyfnewid na rhoi ad-daliad am docynnau a werthwyd. Gwiriwch eich archeb cyn prynu, ac eto wedi’u derbyn, gan na ellir gwarantu cywiro camgymeriadau.

Gofal a Lles

Mae gofal a lles mynychwyr Maes B yn hollbwysig i’r trefnwyr.

Rydym yn cydweithio â phartneriaid allanol fydd yn bresennol ar y safle, sy’n darparu gwasanaethau lles a meddygol i fynychwyr Maes B. Mae iechyd corfforol ac emosiynol yn ogystal â lles cyffredinol mynychwyr Maes B yn flaenoriaeth i’n holl bartneriaid. Mae hyn yn cynnwys cefnogaeth i ddiogelu, cefnogaeth i wella os yn dioddef o unrhyw anhwylder, a chefnogaeth i atal rhag unrhyw sefyllfa sy’n bygwth codi.

Os ydych chi’n poeni am unrhyw beth, gan gynnwys effeithiau cyffuriau ac alcohol, ewch at aelod o’r tîm diogelwch, un o weithwyr St John’s neu at Staff Maes B â fydd yn bresennol ar y safle drwy gydol yr wythnos

Yn ogystal, rydym yn cydweithio â gwasanaeth

Dan 24/7 – llinell gymorth ddwyieithog sy’n cynnig un pwynt cyswllt i unrhyw un sydd angen gwybodaeth neu help mewn perthynas â chyffuriau ac alcohol.

Ffoniwch 0808 808 2234 (gwasanaeth 24 awr am ddim, ni fydd y rhif hwn yn ymddangos ar filiau)

Tecstiwch y gair DAN gyda’ch cwestiwn i 81066 (gwasanaeth 24 awr)

Cyfryngau cymdeithasol – www.facebook.com/Dan247helpline

Lleihau Trosedd a Diogelwch Personol

Mae’r Eisteddfod a Maes B yn ŵyl heddychlon, ond mae rhywfaint o droseddu yn gallu digwydd yn anffodus.

Lladrata yw’r drosedd fwyaf cyffredin, a gall hyn fod yn lladrad oddi arnoch chi yn bersonol neu o bebyll. Bydd staff diogelwch a stiwardiaid yn gofalu am y safle a defnyddir camerâu cylch cyfyng – ar y safle ac oddi ar y safle – er mwyn atal trosedd.

Gallwch helpu chi eich hun drwy ddilyn y cyngor isod. Peidiwch â gadael i droseddwyr ddifetha eich mwynhad drwy gyflawni trosedd yn eich erbyn chi neu eich ffrindiau.

Eiddo

Gwagiwch a chlowch eich cerbydau. Gadewch y blwch menig ar agor i wneud yn amlwg ei fod yn wag. Ewch ag unrhyw beth gwerthfawr gyda chi a gwnewch yn siŵr nad oes marciau crwn ar y ffenest i ddangos bod ‘Satnav’ wedi cael ei osod yno. Mae lladron yn edrych am y marciau crwn hyn i asesu a yw hi werth torri i mewn, yn y gobaith bod eich Satnav yn dal yn y cerbyd.

Dewch â dim ond yr hyn y gallwch fforddio ei golli gyda chi.

Gosodwch eich pabell wrth ymyl un eich ffrindiau, a gwnewch ffrindiau gyda’ch cymdogion. Cadwch olwg ar eiddo eich gilydd.

Marciwch eich eiddo: rhowch label clir ar eich eiddo (gan gynnwys eich pabell) gyda’ch cod post. Bydd rhoi marc amlwg na ellir ei ddileu yn cynyddu’r siawns i’ch eiddo gael ei ddychwelyd os deuir o hyd iddo. Cysylltwch rif ffôn a chyfeiriad ffrind i’ch allweddi.

Os ydych yn dod i’r Eisteddfod neu i Maes B ar gefn beic fe fydd man lle y gallwch gloi eich beic ar y safle.

Ewch ag unrhyw eitemau gwerthfawr – gan gynnwys meddyginiaethau ar bresgripsiwn – gyda chi pan fyddwch yn gadael eich pabell: gwnewch yn siŵr eu bod nhw gyda chi neu gallwch eu cadw yn y mannau cloi diogel. Cofrestrwch eich eiddo cyn i chi fynd ar gronfa ddata genedlaethol rad ac am ddim o’r enw www.immobilise.com

Er mwyn gwneud hi’n anodd i ladron, gadewch eich pabell yn anniben fel nad oes bag amlwg i’w fachu yn sydyn.
Cyngor Lladrad / Pebyll

Er mwyn ceisio sicrhau nad oes lladradau yn digwydd gyda’r nos, rhowch eich waled/pwrs/ffôn, i mewn yn eich sach cysgu gyda chi tra eich bod yn cysgu.

Merched: nid fydd cadw eich bag llaw neu eich ffôn wrth ymyl eich gobennydd yn eich atal rhag dioddef lladrad posib. Rhowch nhw y tu mewn i’ch sach cysgu tra eich bod yn cysgu.

Dynion: peidiwch â gadael eich waled/ffôn/arian parod ym mhocedi eich trowsus neu eich siorts, gan fod y rhain yn cael eu bachu gan leidr sy’n cymryd yn ganiataol eich bod wedi eu gadael yno. Rhowch nhw y tu mewn i’ch sach cysgu gyda chi.

Mae rhai pebyll yn caniatáu i chi symud y sip y naill ffordd a’r llall. Os yw sip y babell wedi cael ei gau i lawr yr unig beth sydd raid i leidr ei wneud yw agor y sip ychydig o’r ffordd a gall gyrraedd yn hawdd i mewn i waelod eich pabell. Gallant hefyd fod ar eu cwrcwd ac allan o’r golwg. Os ydych wedi cau’r sip i FYNY ni all lleidr estyn i mewn mor hawdd, ac efallai y bydd raid iddo aros ar ei draed a bod yn haws ei weld.

Byddwch yn ddyfeisgar wrth guddio eich eitemau gwerthfawr pan fyddwch yn cysgu: efallai na fyddwch yn clywed rhywun yn dod i mewn i’ch pabell, felly cadwch eitemau gwerthfawr a symiau o arian ar wahân a’u cuddio mewn gwahanol lefydd yn eich pabell, neu’n well byth, rhowch nhw yn eich sach cysgu gyda chi.

Os ydych chi’n meddwl y byddwch wedi anghofio ymhle yr ydych wedi gosod eich pabell, tynnwch lun o’r ardal ac unrhyw nodweddion anarferol gerllaw ar eich ffôn symudol fel y gallwch weld beth sy’n edrych yn gyfarwydd.
Ffonau Symudol

Gwnewch nodyn o’r rhif IMEI ar gyfer unrhyw ffonau symudol sydd gennych. Gallwch weld beth yw hwn drwy bwyso *#06# ar eich ffôn. Bydd hyn yn galluogi i’ch darparwr gwasanaeth ganslo’r darn llaw a sicrhau nad yw’n dda i ddim i neb arall sy’n ei ddefnyddio os caiff ei ddwyn.

Os oes gennych chi ffôn clyfar, ysgogwch yr ap ‘find my phone’ neu rywbeth tebyg. Gwnewch yn siŵr eich bod yn nodi unrhyw enwau defnyddiwr neu gyfrineiriau.

Rhestrwch ychydig o gysylltiadau fel rhai I.C.E. (In Case of Emergency) ar eich ffôn symudol, fel y bydd y gwasanaethau brys, os daw i’r gwaethaf, yn gallu cysylltu â’ch teulu – gall hefyd olygu y gallwn gael y ffôn yn ôl i chi. (Rhifau ffôn rhieni ac aelodau eraill o’r teulu neu ffrindiau agos ddylai’r rhifau ICE fod).
Diogelwch Personol

Mae trefnu man cyfarfod gyda’ch ffrindiau rhag ofn i chi gael eich gwahanu yn hanfodol gan na ellir dibynnu ar gael signal ffôn ac mae’n hawdd methu galwadau ffôn oherwydd lefelau sŵn. Trefnwch fannau cyfarfod ar gyfer ardaloedd gwahanol fel y gallwch chi i gyd ddod at eich gilydd yn gyflym ac yn hawdd.

Peidiwch â mynd i lefydd eraill gyda phobl nad ydych yn eu hadnabod. Os ydych wedi cael ffrae gyda’ch ffrindiau neu’n teimlo’n simsan neu’n emosiynol oherwydd gormod o rywbeth – siaradwch ag aelod o staff – maen nhw yno i’ch helpu chi!

Arhoswch gyda ffrindiau neu bobl yr ydych yn ymddiried ynddynt: yn anffodus, mewn unrhyw fan lle mae nifer fawr o bobl yn ymgasglu mae nifer fechan o bobl yn dod yno i fanteisio ar bobl eraill. Rydych yn darged llawer llai amlwg ac agored i niwed fel grŵp nag ar eich pen eich hun.

Dylech osgoi mannau tywyll a manteisio ar y golau ychwanegol ar hyd ffyrdd agored ac yn y meysydd parcio.

Peidiwch â herio pobl sy’n edrych drwy bebyll – dywedwch wrth staff yr Eisteddfod neu’r Heddlu amdanynt. Mae stiwardiaid y maes pebyll yno er mwyn i chi adrodd am ymddygiad amheus ac FE FYDD drwgweithredwyr yn cael eu hel oddi ar y safle.

Rhowch wybod i stiwardiaid am unrhyw un sy’n ymddwyn yn amheus neu’n ymosodol.

Ry’n ni’n gwybod y byddwch am gael diod neu ddau, ond dylech ystyried y gall yfed yn ormodol eich gadael yn agored i niwed, felly, fel ffrindiau, DYLECH ofalu am eich gilydd. Os ydych yn digwydd cael eich gwahanu oddi wrth eich ffrindiau a’ch bod yn teimlo ormod ar goll i gwrdd â nhw yn eich man cyfarfod, a’ch bod yn teimlo’n simsan oherwydd diod, siaradwch â stiward a all eich helpu yn hytrach na phobl ddiarth.
Synnwyr Arian

Peidiwch â chadw eich arian a’ch eitemau gwerthfawr yn yr un lle: rhowch nhw mewn pocedi gwahanol.

Gwisgwch eich band arddwrn bob amser.

Dim ond y cardiau credyd sydd eu hangen arnoch y dylech eu cario gyda chi.

Gwnewch nodyn o rif eich cerdyn credyd a’i adael adref, yn ogystal â’r rhif i’w ffonio os ydych yn digwydd eu colli (fe fydd gwybodaeth am rifau ffôn ar gyfer cardiau credyd sydd ar goll ar gael yn y Mannau Gwybodaeth).

Os ydych am ddefnyddio bag llaw, ystyriwch fag llaw sy’n mynd ar draws eich corff lle mae prif ran y bag yn cael ei wisgo ar y tu blaen, a gyda’r fflap yn erbyn eich corff, a chofiwch gau’r sip!
Cyffuriau

Mae’r Eisteddfod Genedlaethol yn gweithredu polisi ‘dim goddefgarwch’ tuag at rheini sy’n cael eu dal gyda chyffuriau yn eu meddiant. Mae peryglon yn gysylltiedig â phob math o gyffuriau a’r unig ffordd i osgoi’r peryglon hynny yw peidio â’u cymryd. Ar yr un pryd, rydym yn cydnabod bod cyffuriau yn bresennol o fewn cymdeithas, ac rydym yn gweithio gyda phartneriaid cydnabyddedig er mwyn sicrhau lles pobl ar ein safleoedd.

Ein polisi dim goddefgarwch

Mae’r Eisteddfod Genedlaethol yn gweithio’n agos â lluoedd yr heddlu ar draws Cymru. Fe fydd swyddogion yr heddlu’n bresennol ar ein safle. Fe fyddwn ni’n cyfeirio unrhyw un sy’n cael ei ddal gyda chyffuriau yn ei feddiant at yr heddlu, a’u gwahardd o Faes B a holl safleoedd yr Eisteddfod Genedlaethol yn syth.

Mi fydd biniau cyffuriau amnest ar gael i’w defnyddio’n wirfoddol ac yn anhysbys ar Faes B.
Alcohol

Mae alcohol yn cael ei werthu ar Faes B i bobl sydd dros 18 oed. Rydym hefyd yn caniatáu i ymwelwyr dros 18 oed ddod â chyflenwad o alcohol personol i’w pebyll (ond ddim i mewn i gigs). Gweler y wybodaeth bellach yn nes ymlaen yn y ddogfen hon ynglŷn â chyfyngiadau ac amodau. Fodd bynnag, mae’r tîm ar Faes B yno er mwyn sicrhau bod pawb yn medru mwynhau mewn amgylchiadau diogel, felly mi fydd unigolion sy’n ymddwyn yn wrthgymdeithasol neu’n afreolus yn cael eu gwahardd yn syth.

Rydym yn annog ymwelwyr â Maes B i bwyllo, gan sicrhau nad ydyn yfed cymaint fel eu bod yn colli rheolaeth nac yn gwneud penderfyniadau peryglus.

Os oes angen cymorth arnoch chi, neu os gwelwch chi rywun sydd angen cymorth, tynnwch sylw aelod o’r tîm diogelwch a fydd yn cydlynu gyda’r gwasanaethau meddygol a lles ar Faes B.